Pasha (Leldīnu peirāgs)

Recepti izstuosteja saimiņeica Zinaida Prokofjeva, Aglyunas nūvods, Gruoveru pogosts, sāta “Laimduotys”



Īraugam:
Pagatavuošona:
Uzkarsētā pīnā izšķeidynoj raugu. Pīber cukri, vysu kuorteigi izmaisa. Vysu laiku maisūt, īsejoj myltus. Īraugam juosaveidojās ļeidzeigam bīzuo kriejuma masai. Piec garšys var daļikt vaniļis cukri. Īraugu nūvītoj syltā vītā, lai uzryugst.

Pamatmeiklei:
Ūlys sakuļ, svīstu iz lānys guņs izkausej. Itū masu daļīk kluot īraugam. Meikļī pa mozam īsejoj myltus i kuorteigi izmeica. Kluot var dabuoveit rozīnis. Ļīk raudzētīs apmāram 30 minutys. Protviņi īsmierej ar eļli. Meikļi sadola vairuokuos daļuos i izkuortoj tū iz protviņis. Ar atlykušū meikļis daļi rūtoj peirāgu: izruļļej pluonys slūksneitis i nu vīnys pusis sagrīž, veidojūt buorkstis; nu meikļis veidoj peiņeitis, bet sasīnūt opoluos meikļis slūksneitis mazglā, sataisa putnus, izveidojūt spuornus, golvu i asti. Pa viersu puorzīž ar ūlu. Rūtojūt peirāgu, tuo augšpusī veidoj krysta zeimi. Cep cepļī apmāram stuņdi.
––––––––––––––––––––––––––––––––––––––––––––––––––––––––––––––––––––––––––––––––

Guļbišņīki/ kartofļaņiki

Recepti izstuosteja saimiņeica Mareja Nikifirova, s. Pitrini, Izvoltys pogosts, Kruoslavys nūvods



Ar myzu vuoreituos buļbys (parostai jam mozuos buļbys) nūlaupa i vēļ syltas sameica. Meica iļgi, ļeidz mugura slapņa. Sagrīztūs kuopustus sutynoj ar burkuonim i seipūlim. Piec garšys buļbu meikļei pīvīnoj suoļi. Iz golda paber drupeit myltu, lai nalypst meikļe i veidoj plaukstys lieluma pluoceņeišus. Tūs pylda ar sutynuotim kuopustym, puorlūka iz pusem i molys saspīž. Ļīk pateļņī i cap krīvu cepļī. Gotovus puorzīž ar izkausātu svīstu.
––––––––––––––––––––––––––––––––––––––––––––––––––––––––––––––––––––––––––––––––

Kokorys

Recepti izstuosteja saimiņeica Mareja Nikifirova, s. Pitrini, Izvoltys pogosts, Kruoslavys nūvods

Cep nu maizis (rudzu myltu) voi peirāgu (kvīšu) meikļis. Apmāram 4 stuņdis maizei juosacap. Nu meikļis, kas paļīk puori, veidoj pluoceņeišus – kokorys – apmāram pierksta bīzumā i pateļņis lelumā. Pateļņi ļīk cepļī iz ūglem pi pošys molys, par tū ka dziļuok cepļī cepas maize. Kod vīna puse apcepta, apgrīž ūtru pusi. Kokora sanuok bryuna ar garūzeņi. Ēd ar svīstu ci taukim. Taipot kokorys cepa arī nu peirāgu meikļis.
Par kokoram daudzi sauc arī smolkmaizeitis ar bīzpīnu. Nu rauga meikļis izveidoj kvadrāteņus. Bīzpīnam dabuovej ūlys i cukri. Piļdejumu ļīk meikļis kvadrāteņī i salūka, saīt trejstyurs. Puorzīž ar sakultu ūlu. Cep cepļī.
––––––––––––––––––––––––––––––––––––––––––––––––––––––––––––––––––––––––––––––––

Vuoreits cukris

Recepti izstuosteja saimiņeica Mareja Nikiforova, s. Pitrini, Izvoltys pogosts, Kruoslavys nūvods

Cukri īber kotlā, īkuļ ūlu, daļaj pīna i vysu laiku maisūt vuorej iz lānys guņs. Kod suok styprai burbuļuot, var daļikt gabaļeņu svīsta. Gotovs tod, kod paļīk bryuns i vairs nasastaipa. Nūjam nu guņs i turpynoj maiseit. Ja masa suok burbuļuot, tod vēļ pīļej drupeit soltuo iudiņa. Salej lāzanūs šķeivūs ci bļūduos, kurys īzīstys ar svīstu, lai vīgļuok nūjimt. Kod cukris sacītēj, izjam nu traukim i sagrīž gabaļeņūs. Ēd pi čaja.
––––––––––––––––––––––––––––––––––––––––––––––––––––––––––––––––––––––––––––––––

Skuobū kuopustu zupa

Recepti izstuosteja saimiņeica Mareja Nikiforova, s. Pitrini, Izvoltys pogosts, Kruoslavys nūvods

Parostai taidu zupu vuorej cepļī zīmys mieņešūs. Kotlā ar iudiņi ļīk ļelu gobolu cyukgaļis – lai byutu gon ļīso gaļa, gon tuklo, i vuorej, vāluok dalīk skuobūs kuopustus. Var daļikt kluot buļbys voi gruci. Pīvīnoj lauru lopys, suoļi i piparus. Vuorej (sutynoj) cepļī divys stuņdis. Gaļu izjam nu kotla i var ēst atsevišķai nu zupys. Skuobū kuopustu zupu var ēst ņedeli – tei paļīk vēļ gorduoka. Var vēļ sasaldāt, garša nu tuo nasamainuos.
––––––––––––––––––––––––––––––––––––––––––––––––––––––––––––––––––––––––––––––––

Sutynuoti kuopusti ar gaļi

Recepti izstuosteja saimiņeica Mareja Nikiforova, s. Pitrini, Izvoltys pogosts, Kruoslavys nūvods

Nalelu kuopustgolvu sagrīž gar kacānu sešuos voi ostoņuos daļuos (atkareibā nu kuopusta lieluma). Kotlā ļīk puormeiš kuopustu šķālis i cyukgaļis ribeņis ci gaļu bez kaula, pīvīnoj suoļi, piparus i lauru lopys. Sutynoj cepļī.
––––––––––––––––––––––––––––––––––––––––––––––––––––––––––––––––––––––––––––––––

Batviņu kampetys

Recepti izstuosteja saimiņeica Zinaida Prokofjeva, Aglyunys nūvods, Gruoveru pogosts, sāta “Laimduotys”

Sviežus batviņus sagrīž mozūs kubeņūs voi naļeluos, pluonuos slūksneitīs i ļīk kaļtetīs syltā cepļī. Izīt soldonys i cīši gordys. Seņuok bārni ēda tuos kampetu vītā.
––––––––––––––––––––––––––––––––––––––––––––––––––––––––––––––––––––––––––––––––

Mīžu putruomu zupa

Recepti izstuosteja saimiņeica Zinaida Prokofjeva, Aglyunys nūvods, Gruoveru pogosts, sāta “Laimduotys”

Mīžu putruomus apļaj ar iudiņi i ļīk cepļī sutynuotīs. Zupa paļīk ar drupeit sorkoneigu īkruosu. Ēd ar kriejumu.
––––––––––––––––––––––––––––––––––––––––––––––––––––––––––––––––––––––––––––––––

Batviņu kvass

Recepti izstuosteja saimiņeica Zinaida Prokofjeva, Aglyunys nūvods, Gruoveru pogosts, sāta “Laimduotys”

Sorkonūs batviņus aplej ar iudiņi i nūļīk syltā vītā. Stuov apmāram mienesi.