Gefilte fiš (piļdeituo ļeidaka)
Recepti izstuosteja saimiņeica Regīna Seiliša, kurys mama Valereja Markovska (25.08.1918.–02.05.2007.), struodojūt kruoslavīšu Drizinu saimī, īsavuiciejuos gatavuot ebreju iedīņus. Kruoslava.
- ļeidaka
- seipūli
- burkuoni
- manna
- suoļs
- pypari
Nagrīžūt ļeidakys vādaru, nūmozgoj i nūteirej ļeidaku, uzmaņeigai nūvalk uodu. Nu osokom atdaļeitū gaļu 2-3 raizis samaļ gaļis mašynā. Kluot pīvīnoj mannu, seipūlus, graudu pyparus, dabuovej drusceņ svīsta i suoļi. Masu pylda ļeidakys uodā. Kastruļī izkuortoj gradzanūs sagrīztūs seipūlus i burkuonus. Ļīk piļdeitū ļeidaku i puorļaj ar soltū iudiņi. Kod iudiņs uzavuorej, pīļaj drupeit soltuo iudiņa. Taidu darbeibu izdora treis raizis. Garšai pīvīnoj suoļi i pyparus. Ļeidaku pasnīdz izkuortuotu iz zaļajom lopom i rūtuotu ar vuoreitim burkuonim.
––––––––––––––––––––––––––––––––––––––––––––––––––––––––––––––––––––––––––––––––
Cimess
Recepti izstuosteja saimiņeica Regīna Seiliša, kurys mama Valereja Markovska (25.08.1918.–02.05.2007.), struodojūt kroslavīšu Drizinu saimī, īsavuiciejuos gatavuot ebreju iedīņus. Kruoslava.
- 1 kg vystas gaļis
- 1 – 1,5 kg sviežu burkuonu
- seipūli
- pypari
- lauru lopys
Drupeit apcep vystas gaļi i ļīk kastruļī sutynuotīs iz lānys guņs. Burkuonus nūteirej, sagrīž ripeņuos i apcep. Burkuonus īber kastruļī kūpā ar vystas gaļi, pīvīnoj kluot sagrīztus seipūlus, pyparus, lauru lopys. Ja sutynojūt ir pamoz šķidruma, kluot pīvīnoj vuoreitu iudiņi.
––––––––––––––––––––––––––––––––––––––––––––––––––––––––––––––––––––––––––––––––
Peirāgs
Recepti izstuosteja saimiņeica Regīna Seiliša, kurys mama Valereja Markovska (25.08.1918.– 02.05.2007.), struodojūt kroslavīšu Drizinu saimī, īsavuiciejuos gatavuot ebreju iedīņus. Kruoslava.
Meiklei:
- 200 g svīsta
- 1 gluoze cukra
- 2 ūlys
- 2 gluozis myltu
- 1 mozuo ļizeika sodys
- 1 mozuo ļizeika capamuo puļviera
- 200 g kriejuma
- 1 mozuo ļizeika vaniļys ekstrakta
Pagatavuošona:
Sajauc myltus ar sodu i capamū puļvieri. Bļūdā sakuļ svīstu, ūlys i cukri. Pīvīnoj kluot myltus i sakuļ ar mikseri ļeidz masa ir vīndabeiga. Pīvīnoj kriejumu i vaniļys ekstraktu.
Piļdiejumam:
- 1 gluoze smolkai sasmalcynuotu valrīkstu
- ½ gluozis cukra
- 2 mozuos ļizeikys kanieļa
Pagatavuošona:
Capamū formu īsmierej ar svīstu i pīber ar myltim, īļaj pusi nu meikļis, viersu puorber ar pusi nu rīkstu piļdiejuma. Tod pīvīnoj atlykušū meikļis daļi i puorkaisa ar atlikušū piļdiejuma daļi. Puorļaj peirāgu ar izkausātu svīstu i cep 180º temperatūrā cikom peirāgs ir gotovs.
––––––––––––––––––––––––––––––––––––––––––––––––––––––––––––––––––––––––––––––––
Hala
- 4-5 gluozis myltu
- ½ gluozis augu eļļis
- 3 mozuos ļizeikys suoļa
- 1 leluo ļizeika cukra
- 1 gluoze varduša iudiņa
- ½ gluozis soltuo iudiņa
- 1/3 gluozis ramdana iudiņa
- 45-50 g rauga
- 3 ūlys
- mogonu vai sezama siekliņis piec garšys
Bļūdā sajauc eļļu, suoļi i cukri, daļaj korstu iudiņi i samaisa, vāluok pīļaj soltū iudiņi i vēļreiz vysu samaisa. Raugu izšķeidynoj syltā iudiņī. Atsevišķā traukā saputoj ūlys i vysu saļaj bļūdā, atstuojūt puors ļizeikys sakultū ūlu halys puorzīšonai. Bļūdā īber myltus i īmeica meikļi. Meikļi puorļīk iz dieļeiša i meica, cikom tei vairs nalypst da rūku. Vajadzeibys gadejumā pīvīnoj vēļ myltus. Meikļi ļīk atpakaļ bļūdā, puorsadz ar teiru salveti ci dvīļi i ļīk syltā cepļī (tai nav juobyut kuorstai) iz 1 mynutys. Tod izjam uorā i 1 stuņdi atstuoj syltā telpā. Meiklei juoizaug. Tod meikļi sadola 4 daļuos, kotru nu tom sadola vēļ 3-4 daļuos. Kotru gabaļeņi izruļļej deseņī i nu tom sapyn 3-4 bizeitis. Ļīk iz ītaukuotuos pateļņis i atstuoj apmāram iz 45 mynutom, lai uzbrīst. Apzīž ar ūlu, puorkaisa ar siekļiņom i cep vidieji korstā cepļī apmāram 30-40 mynutis. Gotovu halu izjam nu cepļa, nūļīk iz dieļeiša, puorsadz ar salveti ci dvīļi i viersā uzļīk kaidu smogumu. Piec 10-15 mynutom puorsagu nūjam i ļaun atdzist.
Teiglahs. Kreplahs, Aingemahts. Ebreju virtuves receptes. Sastādīja Dr. rabīns Menahems Barkahans. 2012
––––––––––––––––––––––––––––––––––––––––––––––––––––––––––––––––––––––––––––––––
Foršmaks
Recepti izstuosteja saimiņīks Boriss Magidas, Kruoslava
- 1 siļče
- 1 seipūls
- 1-2 uobuļi
- 2-3 boltmaizis šķālis
- 50 g svīsta
- ½ mozuos ļizeikys cukra
- ½ mozuos ļizeikys etiķa
- 50 g pīna
Siļči izteirej, atstuojūt tikai fileji. Samaļ gaļis maļamajā mašynā. Smolkai sagrīž seipūlu, apkaisa ar cukri i īļaj etiķi. Baltmaizi īmiercej pīnā i samaļ. Uobuļam nūteirej mizeņi, samaļ i dabuovej vysai masai, kluot ļīk svīstu, moltūs pyparus i vysu labi samaisa. Izkuortoj salātu traukā, uzber viersā zaļūs lūceņus.
––––––––––––––––––––––––––––––––––––––––––––––––––––––––––––––––––––––––––––––––
Pīna zivju zupa
Recepti izstuosteja saimiņīks Boriss Magidas, Kruoslava
- 400 g zivju filejis (ļeidaka, asars)
- 2-3 buļbys
- 1 seipūls
- 1 bunteite kropu
- 300 ml pīna
- 1 leluo ļizeika myltu
- 1 leluo ļizeika svīsta
- Suoļs
Buļbys sagrīž i ļīk vuoreitīs nalelā daudzumā varduša iudiņa. Dabuovej sagrīztu seipūlu, suoļi i vuorej 5-7 mynutis. Daļīk sagrīztu zivs fileji i pīļaj vuorušo iudiņi, lai nūsadz zivi. Vuorej vāļ 15 mynutis. Pīvīnoj svīstu i pīnu, kurā īmaiseiti mylti. Vuorej vēļ 2-3 mynutis. Pīvīnoj kropus. Nūjam nu guņs i ļaun 3-4 mynutis nūsastuot.
––––––––––––––––––––––––––––––––––––––––––––––––––––––––––––––––––––––––––––––––
Farfelahs
- leluos ļizeikys mannys
- 300 g kvīšu myltu
- 3 ūlys
- 1/3 mozuos ļizeikys suoļa
Traukā īsyt ūlys, daber suoļi i sakuļ. Atsevišķā traukā īber mannu, ar lizeiku pajam saputuotuos ūlys, ļīk mannai viersā i ar rūkom izļeidzynoj tai, lai ūla apjimtu putruomus. Pa mozam pīvīnoj myltus i ūlys, berziejūt ar rūku, veidoj putruomus. Farfelaha putruomim juobyut opolim, drusceņ mozuokim par zierņim. Pagatavuotū izstruoduojumu pluonā kuorteņā ļīk iz papeira lopys i ļaun apžyut. Farfelahu var žuovēt arī cepļī, bez eļļis, vysmozuokuojā korstumā. Labi ižžuovātus farfelahus var globuot sausā vītā 2-3 mienešus. Ļītoj buljonam i zupom, ci kai pīdevu gaļis iedīņim.
––––––––––––––––––––––––––––––––––––––––––––––––––––––––––––––––––––––––––––––––
Teiglahs
- 2,5 gluozis myltu
- 2 g suoļs
- 1 leluo lizeika sodys
- 4 ūlys
- 4 leluos lizeikys augu eļļis
- ¾ cukra
- 0,5 kg mada
- 1 mozuo lizeika moltuo ingvera
- ½ mozuo lizeika muskatrīkstu
- 2 gluozis rīkstu
Izsejoj myltus, samaisa ar suoļi i sodu, daļīk kluot ūlys, eļļi i ījauc styngru meikļi. Meikļi sadola gabaļeņūs i nu kotra gabaļeņa veidoj deseņis zeimuļa bīzumā. Kotru deseņi sagrīž 0,5 cm garūs gabaļeņūs i ļīk iz vīgli ītaukotys cepamuos plāts. Cep vidiejā korstumā 20 mynutys, cikom tī palīk gaišai bryuni. Cepšonys laikā plāti divys reizis sakrota. Katļeņī sajauc madu, cukri, ingveru, muskatrīkstu i vuorej 15 mynutys. Pīvīnoj izceptūs meiklis gabaļenus i vuorej vēļ 5 mynutys. Tod pīvīnoj rīkstus i maisūt vuorej vēļ 10 mynutys. Teiglahs ir gotovs, kod piļīns naizplyust pa mitru viersmu. Maisiejumu uzļīk iz mitra dieļa, nadaudz atdzesej i sagrīž gabaļeņūs. Nu masys var veidot bumbeņis. Ja nav rīkstu, tūs aizvītoj ar 2 gluozem izceptys meikļis gabaļeņim.
Teiglahs. Kreplahs, Aingemahts. Ebreju virtuves receptes. Sastādīja Dr. rabīns Menahems Barkahans. 2012
––––––––––––––––––––––––––––––––––––––––––––––––––––––––––––––––––––––––––––––––
Aingemahts (rutki mAdĀ)
Ruktus nūteirej i satarkavoj iz rupos reivis. Katļeņī izkausej madu, pīvīnoj kluot grīzīņus i vuorej, cikom grīzīņi ir kļuvušy bryungoni.
Teiglahs. Kreplahs, Aingemahts. Ebreju virtuves receptes. Sastādīja Dr. rabīns Menahems Barkahans. 2012