Skuobūs kuopustu zupa
Recepti izstuosteja saimiņeica Leokādija Sosnovska, Krāslavas nūvods, Ūdrīšu pogosts, Mozū Muļķu cīms
- skuobātī kuopusti
- pupys
- cyukgaļis ribeņis
- suoļs
Cyukgaļis ribeņis ļīk vuoreitīs kotlā ar iudiņi. Kod gaļa ir drupeit pasavuoriejusīs, daļīk skuobātūs kuopustus, nadaudz vāluok pīvīnoj izmārcātys pupys. Piec garšys dalīk suoļi. Gotovu zupu pasnīdz ar mizuos vuoreitom buļbom.
––––––––––––––––––––––––––––––––––––––––––––––––––––––––––––––––––––––––––––––––
Gruca ar skvarkom
Recepti izstuosteja saimiņeica Leokādija Sosnovska, Krāslavas nūvods, Ūdrīšu pogosts, Mozū Muļķu cīms
Putrai:
Miercei:
- cyukgaļa
- seipūly
- suoļs
- pypari
Kastruļī ļīk vuoreitīs iudiņi, kod tys uzavuorej, dabuovej uzbrīdynuotu gruci. Vuorej iz lānys guņs, daber suoļi piec garšys. Kod putra gotova, var pīvīnuot kluot drupeit svīsta voi kriejuma.
Gaļi sagrīž mozūs kubeņūs i ļīk ceptīs iz pateļņis. Kod gaļa ir apcepta, kluot pīvīnoj sagrīztus seipūlus. Piec garšys var pīvīnuot suoļi i pyparus. Putru pasnīdz, porlītu ar ceptys gaļis i seipūlu mierci.
––––––––––––––––––––––––––––––––––––––––––––––––––––––––––––––––––––––––––––––––
Auzu puorslu ķeiseļs
Recepti izstuosteja saimiņeica Leokādija Sosnovska, Krāslavas nūvods, Ūdrīšu pogosts, Mozū Muļķu cīms
- auzu puorslys
- malnuo maiza
- suoļs
- iudiņs
Auzu puorslys apļaj ar syltu iudiņi i pīvīnoj dažys malnuos maizis garūzeņis. Masu nūļīk syltumā i raudzej 2 – 3 dīnnaktis. Īgyutū masu pa daļom stingri izspīž caur sīteņu. Šķidrumu, napuortraukti maisūt, vuorej iz lānys guņs. Piec garšys var pīvīnuot suoļi. Kod sakarsātuo masa uzmat burbuļus, ķeiseļi saļaj traukā, tys atdzīst i vāļ vairuok sabīzej. Var pasņīgt kūpā ar soltu pīnu.
––––––––––––––––––––––––––––––––––––––––––––––––––––––––––––––––––––––––––––––––
Soldonuos kļockys ar kaltātim uobuļim
Recepti izstuosteja saimiņeica Leokādija Sosnovska, Krāslavas nūvods, Ūdrīšu pogosts, Mozū Muļķu cīms
- kaltāti uobuļi
- cukris
- mylti
Kod iudiņs sok vuoreitīs, ļīk kaltātus uobuļus i nadaudz pavuorej, piec garšys daber cukri. Atsevišķā traukā sakuļ ūlys ar cukri, maisūt pakuopeniski pīvīnoj myltus, vysu kuorteigai izmaisa. Ar lizeiku jam pa drupeitei meiklis i ļīk kotlā, veidojūt mozys kļockys. Vourej koleidz gotovys.
––––––––––––––––––––––––––––––––––––––––––––––––––––––––––––––––––––––––––––––––
Lauku rudzu maize
Recepti izstuosteja Gundega Grišāne, Kruoslavys rajons, Skaistys pogosts
- rudzu mylti
- kvīšu mylti
- suoļs
- cukris
- ķimeņis
- raugs
- iudiņs
Myltus apļej ar vuoreitu, drusceņ padzysušu iudiņi i sajauc pabīzā masā. Ījauktū meikļi iz pusūtrys dīnys nūļīk syltā vītā cikom meikļe īskuobst. Tod īskuobušū meikļi puormeica, dalīkūt kluot myltus, cukri, raugu, ķimeņis, i suoļi piec garšys. Meikļi ļīk veidnī i pagaida cikom meikļe pasaceļ, tod cep lelajā maizis cepļī pusūtru stuņdi. Maizis meikļei var daļikt kluot rīkstus, rozīņis, kaltātuos šļivys.
Latgales pavārgrāmata.Sastādīja Solvita Kovaļenko. Madona, 2004
––––––––––––––––––––––––––––––––––––––––––––––––––––––––––––––––––––––––––––––––
Sluokatnis
Recepti izstuosteja Broneslava Driksna, Kruoslavys rajons, Andzeļu pogosts
Nu malnuos maizis izveidoj 2 cm bīzu i 20 cm garu meikļis kuortu. Viersā tai ļīk smolkai sagrīztu žuovātu špeku, smolkai sagrīztus seipūlus, paber vysu ar pyparym. Piļdiejumu puorkluoj ar ūtrū meikļis daļi, izveidojūt mozu kukuļeiti. Kukuļeiti nūļeidzynoj, ar pierkstim īspīž suonūs rīvys i cep maizis cepļī. Sluokatnis ir ādams gon korsts, gon solts.
Latgales pavārgrāmata. Sastādīja Solvita Kovaļenko. Madona, 2004
––––––––––––––––––––––––––––––––––––––––––––––––––––––––––––––––––––––––––––––––
Sīrs
Recepti izstuosteja saimiņeica Anna Mileika, Kruoslavys rajons, Dagda
- 8 ļitri svaiga sylta pīna
- 3 ūlys
- suoļs
- ķimenis
Kotlā īļaj gluozi iudiņa, kod iudiņs uzvard, īļaj pīnu i sylda, palaikam pamaisūt, lai napīdag. Sakuļ ūlys i pīļaj drupeit iudiņa, vysu pīvīnoj pīnam. Daber suoļi i ķimeņis. Kod pīns suok vuoreitīs, masu kuorteigi izmaisa. Tod vysu nūjam nu guņs, saļaj sīra kuļī, lai suleņa nūtak, i ļīk zam slūga.
––––––––––––––––––––––––––––––––––––––––––––––––––––––––––––––––––––––––––––––––
Latgolys dasys
Recepti izstuosteja Stanislava Badune, Kruoslavys rajons, Konstantinova
- 700 gr līsuos cyukys gaļis
- 200 gr lellūpa gaļis
- 100 gr svieža špeķa (lašyņa)
- ķimiņis
- suoļs
- pypari
- cukris
- ¾ gluozis iudiņa
Cyukys i ļellūpa gaļu samaļ (var 2 x), dabuovej kubeņūs sagrīztu speķi, ķimiņis, suoļi, pyparus, cukri i iudiņi. Gaļis masu pamateigai sameica i vāsā vītā ļauj gaļai 2 stuņdis uzbrīst. Pylda zornuos, golus aizsīn cīt. Dasu riteņeišus var dyumuot ci cept cepļī iz pateļņis, laiku pa laikam aplaistūt ar iudiņi. Captys deseņis pasņīdz ar sutynuotim kuopustim i vuoreitom buļbom.
Latgales pavārgrāmata. Sastādīja Solvita Kovaļenko. Madona, 2004
––––––––––––––––––––––––––––––––––––––––––––––––––––––––––––––––––––––––––––––––
Studziņs
Recepti izstuosteja saimiņeica Anna Mileika, Kruoslavys rajons, Dagda
- cyukgaļa
- burkuoni
- seipūli
- pipari
- suoļs
Cyukys golvu, kuojis i stylbus sacārt mozuokūs gobolūs i ļīk vuoreitīs (apmāram 1,5 stuņdis) cikom gaļa suok atsadaļeit nu kaulym. Daļīk kluot suoļi, pyparus, seipūlus i burkuonus. Kod gaļa ir gotova, atdola tū nu kaula, sakopuojūt mozūs gabaļeņūs. Kopuotai gaļai pīvīnoj sulu, kurā gaļa vuorejuos. Tū vysu saļaj bļūduos i nūļīk soltā vītā, lai sarecej.
––––––––––––––––––––––––––––––––––––––––––––––––––––––––––––––––––––––––––––––––
Ašņa dasys
Recepti izstuosteja Anna Kursīte, Kruoslavys rajons, Skaistys pogosts
- izteireitas i etiķī izskoluotys zornys
- 2 litri ašņa
- ½ kg mīžu putraimu
- ½ kg griķu putraimu
- 1 gluoze rysa
- 1 litrs tarkavuotu buļbu
- 300 gramu špeka (lašiņa)
- 2 ēdamkarūtis suoļs
Sasmalcynoj seipūlu, pīvīnoj pyparmātru lapeņis, pyparus, suoļi i vysu kūpā ar putraimim apvuorej 1 ļitrā iudiņa. Tod putraimu masai pīvīnoj ašņi i kuorteigai vysu izmeica. Masu pylda zornuos i cep cepļī.
Latgales pavārgrāmata. Sastādīja Solvita Kovaļenko. Madona, 2004
––––––––––––––––––––––––––––––––––––––––––––––––––––––––––––––––––––––––––––––––
Ūliņīks ar burkuonim
Recepti izstuosteja Stanislava Badune, Kruoslavys rajons, Konstantinova
- 6 ūlys
- 100 gr burkuonu
- ½ gluozis pīna
- 1 ļeluo ļizeika svīsta
- suoļs
Sagrīztus burkuonus sutynoj nalelā daudzumā pīna i svīsta. Burkuonus samaļ i samaisa ar ūlu masu, kas sagatavuota deļ ūliņīka (pi sakultom ūlom pīļaj pīnu i pīber kluot suoļi). Ūlu i burkuonu masu izcep iz pateļņis.
Latgales pavārgrāmata. Sastādīja Solvita Kovaļenko. Madona, 2004
––––––––––––––––––––––––––––––––––––––––––––––––––––––––––––––––––––––––––––––––
Kuģeļs
Recepti izstuosteja Lideja Brile, Kruoslavys rajons
Nūskuš buļbys i satarkavoj. Dabuovej suoļi i kuorteigai izmaisa. Masai var daļikt ar seipūlim saceptus špeka (lašiņa) gabaļeņus. Čuguna katļeņi īzīž ar taukim, saļaj sagatavuotū masu, ļīk ceptīs cepļī, kurš ir izakuriejīs, bet ūgļis nu tuo vāļ nav izjimtys. Kugeļam vajag ceptīs dīzgon garai, cikom augšā izaveidojās bryuna garūzeņa. Kod iedīns ir gotovs, ļīk šķeivī, vydā īspīž bedreiti svīksta pikuceitim i kriejuma ļizeikai. Ād, jamūt nu maļeņis i miercejūt bedreitī.
Latgales pavārgrāmata. Sastādīja Solvita Kovaļenko. Madona, 2004
––––––––––––––––––––––––––––––––––––––––––––––––––––––––––––––––––––––––––––––––
Buļbu kļockys
Recepti izstuosteja Sofija Plesņa, Kruoslavys rajons, Osyuna
6 ļelys buļbys satarkavoj iz smolkys tarkys i nūspīž sulu. Kod sula ir drusceņ pastuoviejuse, tū uzmaņeigai nūļaj i cītis nūsādys pīvīnoj buļbom. Tod dabuovej ūlu, suoļi i myltus tik daudz, lai nu masys varātu izveiduot kļockys. Kļockys ļīk vuorušā iudiņī, kuram pīvīnuots suoļs, i vuorej 15 minutys. Tod pīvīnoj pīnu i otkol uzvuorej. Pasnādzūt iz golda, iedīņam kluot var daļikt mozū lizeiku svīsta.
Latgales pavārgrāmata. Sastādīja Solvita Kovaļenko. Madona, 2004
––––––––––––––––––––––––––––––––––––––––––––––––––––––––––––––––––––––––––––––––
Buļbešņīki i krapaņiki
Recepti izstuosteja Tekla Dzalbe, Kruoslavys rajons
- buļbys
- suoļs
- mylti
- krapaņikim vāļ var ļīkt kluot kuopustus i seipūlus
Izvuorej buļbys ar myzom, tūs nūmyzoj i sameica. Iz golda pakaisa drupeit myltu, ļīk viersā buļbu masu i drusceņ apmeica. Savylynoj kai dasu i sagrīž naļelūs gabaļeņūs. Ļīk ceptīs cepļī, pasnādz ar kriejumu. Itū iedīņi sauc par buļbešņīkim. Krapaņikim nu sameiceituos buļbu masys, kurai piec vieļiešonuos var pīvīnuot ūlys, veidoj peirādzeņus ar sutynuotu kuopustu i seipūlu piļdiejumu. Ļīk ceptīs cepļī i pasnādz ar kriejumu.
Latgales pavārgrāmata. Sastādīja Solvita Kovaļenko. Madona, 2004
––––––––––––––––––––––––––––––––––––––––––––––––––––––––––––––––––––––––––––––––
Tatarvans
Recepti izstuosteja Tekla Dzalbe, Kruoslavys rajons
- gūvs molozejs
- ūla
- cukris
- suoļs
Gūvs molozeju vuorejūt, dabuovej ūlu, suoļi i cukri piec garšys. Vuorej cikom vyss sabīzej.
Latgales pavārgrāmata.Sastādīja Solvita Kovaļenko. Madona, 2004
––––––––––––––––––––––––––––––––––––––––––––––––––––––––––––––––––––––––––––––––
Auļejis kļockys
Recepti izstuosteja Tekla Dzalbe, Kruoslavys rajons
- mylti
- raugs
- suoļs
- cukris
- pīns
- bīzpīns
- kriejums
- svīsts
- ūlys
Myltus, raugu, suoļi i cukri ījauc pīnā i gaida, kod uzryugs. Tod meikli sameica parasnā dasā i sagrīž škieļeituos, kurys drupeit saplacynoj. Bīzpīnu sajauc ar kriejumu, svīstu i ūlu. Ar itū masu pylda meikļis škieļeitis. Izveiduotuos kļockys apsmierej ar sakultu ūlu i cep cepļī. Gotovuos ķļockys apļaj ar izkausātu svīstu.
Latgales pavārgrāmata. Sastādīja Solvita Kovaļenko. Madona, 2004
––––––––––––––––––––––––––––––––––––––––––––––––––––––––––––––––––––––––––––––––
Pameikstīs
Recepti izstuosteja Pīters Koroševskis, Kruoslava
- 200 gr vuojpīna bīzpīna
- 50 gr svīsta
- mozuo lizeika suoļa
- svaigys vuoreitys buļbys
Bīzpīnu 1,5 cm bīzā kuortā īkluoj šķeivī, viersā uzkluoj pluonu svīsta kuorteņu, pīber suoļi. Taidu ītaiseitu bīzpīnu ād ar vuoreitom buļbom.
Latgales pavārgrāmata.Sastādīja Solvita Kovaļenko. Madona, 2004
––––––––––––––––––––––––––––––––––––––––––––––––––––––––––––––––––––––––––––––––
Sutins
Recepti izstuosteja Tekla Dzalbe, Kruoslavys rajons
Izsutynoj auzu graudus, izkaļtej tūs sausus i samaļ. Sītā atdola palavys. Myltus īber bļūdā i apļaj ar soldonu, soltu iudiņi, lai var izveiduot opolys kļockys.
Latgales pavārgrāmata. Sastādīja Solvita Kovaļenko. Madona, 2004
––––––––––––––––––––––––––––––––––––––––––––––––––––––––––––––––––––––––––––––––
Sirņīki
Recepti izstuoteja Valentina Trubočajeva, Kruoslavys rajons, Andrupene
- 1 kg bīzpīna sajauc ar 2 ūlom
- 6 ļeluos ļizeikys cukra
- suoļs
- soda
Vysu īprīkšminātū sajauc vīndabeigā masā, kluot īmeica myltus. Kod meikle lypst nu rūkom, tei ir gotova. Nu gotovuos meiklis taisa mozus pluoceņeišus i cep eļļā iz pateļņis, cikom tī paļīk bryuni.
Latgales pavārgrāmata. Sastādīja Solvita Kovaļenko. Madona, 2004
––––––––––––––––––––––––––––––––––––––––––––––––––––––––––––––––––––––––––––––––
Kruoslavīšu gordums
Recepti izstuosteja Jēgers, Kruoslava, 1963. g.
Kruoslavā sovā laikā par sevišķu gordumu uzskatieja sviežus agurkus ar madu. Tikū nūšķeitu agurku nūmyzova, sagrīza ripeņuos i apļāja ar sviežu madu. Āda i sacieja, ka taids agurks ir lobuokais gordums. Svieži agurki ar madu veicynoj kuņģa darbeibu i roda omuļeibys sajūtu. Agurkus ar madu skaitieja par kruoslavīšu nacionālo iedīņi, bet Kruoslavu par agurku golvyspiļsātu. Kotra kruoslavīša duorzeņā beja dažys agurku vogys i, saskaņā ar vītejom paražom, kotrs garāmguojiejs, pazeistams ci svešs, bez atļaujis praseišonys varāja daīt da agurku dūbej i nūšķeit vīnai iešonys reizei agurkus. Iz īlys bīžai gadejuos redzāt – īt kruoslavīts, rūkā trauks ar madu, bet kuldā - agurki.
Latviešu tautas ēdieni. Sastādīja Linda Dumpe. Rīga: 2009
––––––––––––––––––––––––––––––––––––––––––––––––––––––––––––––––––––––––––––––––
Kaļtātais bīzpīna sīrs
Recepte pīraksteita: Daugavpils apriņķis, Auļejis pogosts, Apseņīku cīms, LNVME 2856,7
Nūstuodynoj pīnu, tod nūjam kriejumu i skuobū pīnu ļīk korstā cepļī, lai atsadola suļeņa nu bīzpīna. Tod saļaj kuļī. Kuļa ir pagatavuota nu lynu audakla, lai lobuok nūsatakuos. Kod suļeņa nūteciejuse nu bīzpīna, tod tū izjam uorā, izmaisa ar kūka lizeiku, piec garšys daļīk suoļi. Var vēļ daļikt kluot drupeit mogonu sāklu. Tuos ļīk vairuok na garšys deļ, bet gon smukuma piec, par tū ka sīrs saīt skaistai raibs. Tod ļīk atpakaļ tymā pošā kuļeitī, aizsīn golu cīt i nūlīk storp divim dieļeišim, viersā izļīk akmiņi, lai nūspīstu. Jam uorā piec kaidom puors dīnom. Tod tū ļīk korstā cepļī i tur tī, koleidz paļīk skaistai dzaltons. Taidu sīru globuošonai ir speciālai gatavuoti teikļeņi nu lynu dīgim, kurūs sīru pakar pi ustobys pakša, viers lūga. Juoņu vokorūs saimiņeica sīru pīvuoc, par tū ka pastuov paraža “nūzagt” i par tū ņikaidys struopis nav.
Latviešu tautas ēdieni. Sastādīja Linda Dumpe. Rīga: 2009
––––––––––––––––––––––––––––––––––––––––––––––––––––––––––––––––––––––––––––––––
Sekonkys
Recepte pīraksteita Daugavpiļs apriņķī, Osyunys pogosts, 1926, LNVME 2856, 104
Pagatavoj nu cyukis ci vuškys īkšom. Parosti gatavuošanai izmontoj dzeivnīku sirdi i plaušys. Tū vysu sakopoj. Dalīk kluot buļbys i ūlu. Piec garšys daber suoļi i seipūlus. Nu izveiduotuos masys veidoj pļeckys i cep taukūs iz pateļņis.
Latviešu tautas ēdieni. Sastādīja Linda Dumpe. Rīga: 2009