Ebreju kukņai cīš nūzeimeiga lūma ir rituāla lykumom – kašrut, kas reguļej iedīnu pareizu pagatavuošonu i atļautuo / aizļīgtuo iedīņa ļītuošonu uzturā: dreikst ēst dzeivņīkus, kuri ir puornadži ar škeļtim nogim, atgramuotuoji i zuolāduoji, nadreikst jaukt kūpā pīna i gaļis produktus, ēst cyukgaļi, truša gaļi, zivi bez zveiņom i cytus. Puortykys produkti, kuru izcelsme i pagatavuošona atbylst itim lykumim, teik saukta par treif (treyf). Saskaņī ar Toru, puortyka, pirmkuort, ir gareigīs spāka olūts, pagatavuot i ļītuot tū vajag pareizi, naaizmierstūt pasateiktīs Dīvam. Pareizi sagatavuots iedīņs ir pyrmais sūļs cylvāka piļņveiduošonai.
Ebrejim ir tradicionāluos receptis gon ikdīnas i svātku dīnys goldam, gon sastdīnis (šabata) iedīņim, gon kuozu i saimis sviņeibu iedīņim. Tradicionālī aškenazu(austrumeiropys ebreju) iedīņi ir gefilte fisch(pildīta zivs), cimess(soldons burkuonu i rozīņu voi cytu žuovātu augļu sautiejums), vystys zupa ar kļockom – kneidlah, čolents– gaļis, auzu, buļbu i pupu bīzeņs, soltyis borščs, šmalc(kausāti zūsu tauki). Pyrms Ūtruo pasauļis kara Kruoslavā dzeivuoja ap 33 % ebreju nu pilsātys īdzeivuotuoju kūpskaita. Pašlaik Kruoslavys nūvodā dzeivoj tikai daži ebreju tauteibys puorstuovji, tūmār daži kruoslavīši vēļ atguodoj i izmantoj ebreju iedīņu gatavuošonys receptis sovā kukņī.